Mas Ligtas at Komportableng Sakay para sa mga PWD
Idinagdag ng Kagawaran ng Kagalingang Panlipunan at Pagpapaunlad (DSWD) ang mga electric bus sa kanilang serbisyo upang masigurong ligtas at komportable ang paglalakbay ng mga persons with disabilities (PWDs). Ang hakbang na ito ay tugon sa mga pangamba ng publiko matapos lumabas sa social media ang video ng isang lalaking may autism na inaabuso sa loob ng pampasaherong jeep noong Hunyo 13.
Sa isinagawang inspeksyon at test run ng mga bagong bus noong Hunyo 17, binigyang-diin ni DSWD Secretary Rex Gatchalian ang kahalagahan ng ligtas na sasakyan para sa mga may kapansanan. “Napaka-komportable ng pamasahe dito. Ligtas para sa mga persons with disabilities,” ani niya.
Direktiba ng Pangulo at Proyekto para sa PWD
Ayon kay Gatchalian, ang proyekto ay bahagi ng utos ni Pangulong Marcos Jr. na palawakin ang mga ligtas na espasyo at oportunidad para sa mga bulnerableng sektor. “Ang utos ng ating Pangulo noong nagsimula ako sa DSWD ay siguraduhin na ang proteksyon sa mga bulnerable ay malawak. Kasama dito ang paglulunsad ng mga safe public transport para sa mga may kapansanan,” dagdag niya.
Serbisyong Electric Bus ng DSWD
Ang mga electric bus ay bahagi ng Persons with Disabilities-Electric Transportation Service (PWD-ETS) Project sa ilalim ng Sustainable Livelihood Program (SLP) ng DSWD. Sa proyektong ito, binibigyan ng grant ang mga PWD na miyembro ng mga SLP associations upang makabili at makapagpatakbo ng mga electric vehicle bilang hanapbuhay.
Bawat samahan ay binubuo ng 115 miyembrong PWD mula sa 10 lokal na pamahalaan sa Metro Manila. Kasama nila sa pagpapatakbo ng mga bus ang Global Electric Transport (GET) Philippines Inc., ang napiling service provider.
Hanapbuhay at Serbisyo para sa mga PWD
Ipinaliwanag ni Gatchalian na ang ideya ng hanapbuhay na ito ay upang masiguradong may shuttle service ang mga manggagawang may kapansanan. “Ito yung hanap buhay na naisip nila, kung saan bumabyahe yung mga e-bus na ito na persons with disability-friendly para masigurado na may shuttle ang mga manggagawa natin na may kapansanan,” sabi niya.
Sa kasalukuyan, ginagamit ang mga electric bus bilang shuttle service para sa mga PWD workers sa Bonifacio Global City, Taguig. Kasalukuyan ring nakikipag-ugnayan ang DSWD sa Department of Transportation para palawakin ang operasyon sa Quezon City.
Inaabangan ang Pormal na Turnover
Inaasahan ang ceremonial turnover at blessing ng mga bagong e-bus sa Hunyo 24. Sa pamamagitan ng SLP, natutulungan ang mga mahihirap, bulnerable, at marginalized na grupo na magkaroon ng hanapbuhay at pagbutihin ang kanilang kabuhayan.
Para sa karagdagang balita at mga update tungkol sa ligtas na transportasyon ng PWDs, bisitahin ang KuyaOvlak.com.
